Gäbet acht !
S Hutzgüri chunnt !
2008

Bilder 2006

Am Frytig, dr 5. Hornig 2010 gohts Hutzgüri wieder umme

Läng d Achs und gib ihm; dä Herbscht hetts z Rotheflue in sich gha. So vill Blätter hetts scho lang nümm ummegwäit. Do hetts Wuche geh, wo fascht jede Daag eis im Briefchaschte vor dr Höli vom Hutzgüri gläge isch. Guet isch dä Preesi denn gwehlt worde und hets druff abe Schnee geh, die Boscht verbloose und Alli wieder es bitzeli beruhigt.

Jetz tue ich, s Hutzgüri zäme mitem Schär-muuser, em Bott und de beide Eierwybli zum nünzähnte Mol in dr jüngere Gschicht vo Rotheflue es paar Wybervölcher und Bür-schtli im Dorf under dr Rote Flue mi Uff-wartig mache:

Do wer emol euse ehemolig Sigrischt,
s
Förschterfritze Fritz, wo dr lieb lang Dag syni Milch durs Dorf duure charet.

Denn s Manze Regula in ihrem stozige Heimetli hoch überem Dörfli mit Blick bis uf Basel abe.

Bim Pilzkontrollör, Dorfhischtoriker, Cherze-ziehmitbegründer und Duudelsack-Pfyffer Tschanni Mazzucchelli gyts es churzes Deguschtaziönli us dr grosse Whiskysammlig als Stärkig uffe wytere Wäg.

Dr Wegmüller Peter als neu Menetscher vom Schoppingtämpel erklärt ys denn sy Bisness-plan für die Lütt im Dorf, wo noh nie in dr Cheesi iikauft hei.

Dr bangsioniert Jagduffseher Roland Rieder und syni Jagdhundebandi bringe eus denn hoffentlich uff die rächti Fährte damit mir..

s Kunze Adrian als einzigem Buur ohni Mischstock vorem Huus in synere scho bald 50-jöhrige Boustelle tüe finde.

An dr Strandbar im Gourmetämpel vom Roli und Terri Ammann im Rössli spüele mir eusi Boustell-Staublunge abe und rauche mitene e letschte Stumpe, bevors denn bi dene Zweu ab Mai „Feuer aus“ heisst.

In dr olte Mühli erwarte eus als nöchschts dr Müller Heini und syni Rita zunere Füehrig durs Chue-Altersheim...

... und dr ehemolige Plättlilegger Päuli Wyschopf zeigt eus, wie er als Zytigs-Früezuesteller die Zytige vom Chare us elegant in jede Brief-chaschte schoppet.

Am Chrankebsüechli bim Wittnauer Rosi hinde klärt äs eus uff, was dr Witti mit ihre am erschte Augschte uffem Heiwäg vo dr Flue obenabe gchalberet hett, dass sie fascht es viertel Johr dr Scheiche nid hett chönne bewege.

Z letscht emänd gits no e Audiänz bim neue Pfarrer Lukas Boumä. Dank synere chräftige Poschtur hett dä d Männerriege scho am erschte Durnerobe als Versterkig bim Barreturne chönne iisetze.

De Uuserwählte wei mir in Erinnerig rüefe, dass em Hutzgüri am beschte mit Aastand, Greuktem us dr Chammere und eme guete Tröpfli begeg-nisch. Süscht chönnts denn sy, dass sämtlichi Chatze gstreckt und sogar noh s Dach abdeckt wird. Dorum gäbet Acht!

Und dir wüsset jo: Öbs hudlet oder Chatze haglet – s Hutzgüri blybt immer voruss.

Also denn, bis am Frytig, am 5. Hornig kurz nachem Ynachte in de Gasse vo Rotheflue!

S Hutzgüri

- Herkunft - Brauch - Figuren - Spruch - Hutzgüri 2002 - Galerie - Link